Akhbar Alsabah اخبار الصباح

14 ملاحظة عن بيان الداخلية بشأن "تصفية قتلة ريجيني"

ريجيني علق الكاتب الصحفي محمد الجارحي، عبر صفحته الشخصية بموقع التواصل الإجتماعي "فيسبوك" على رواية الداخلية، التي قالت إنها قامت بتصفية قتلة "ريجيني".

ودوّن "الجارحي" 14 ملاحظة عن بيان الداخلية بشأن مقتل ريجيني وصور متعلقاته" قال فيها:

لا أعرف من يفكر ومن يخطط ومن يراقب هذا الجهاز الأمني.. عموماً الواحد حزين لهذا المستوى المتدني في حبك القصص وتلفيقها.. وهذه بعض الملاحظات على البيان :
١- قالت الداخلية في بيانها إن التشكيل العصابي تخصص فى إنتحال صفة ضباط شرطة وإختطاف الأجانب وسرقتهم بالإكراه.. المتخصص ده خد الدكتوراة بتعتكم امتى وكام حالة خطفها وليه محدش سمع عنها؟؟

٢- البيان بيقول مصرع جميع المتهمين عقب تبادل إطلاق الأعيرة النارية مع قوات الشرطة.. ومتصورين في ميكروباص.. أيه شغل الأفلام النص كم ده؟؟ يعني العصابة كلها بتتحرك في وقت واحد في عربية واحدة؟؟ دول حرامية الموتوسيكلات مش الأجانب ما بيعملوش كده؟؟ بيكون فيه مخطط وناضورجي ومنفذ وواحد بيأمن وواحد بيستلم البضاعة وواحد بيوزعها.. دي عصابة هفأ!!

٣- البيان بيقول تبين من الفحص أنه إزاء تعدد بلاغات السرقة بالإكراه وإنتحال الصفة فى عدد من المناطق.. فين البلاغات دي وفين المناطق دي.. عايزين حالات !!

٤- إذا كان المتهم الرئيسي في القضية مسجل خطر وعليه ٢٤ قضية و٥ احكام.. كُنتُم فين يا حلويين في الحوادث السابقة؟؟ وما نفذتوش ليه الأحكام ؟؟

٥- البيان بيقول : (( عقب تقنين الإجراءات وإعداد الأكمنة اللازمة لضبط المتهمين المذكورين وحال سيرهم بالسيارة رقم ( ق ف 871 ميكروباص ) بدائرة قسم شرطة أول القاهرة الجديدة ولدى مشاهدتهم للقوات قاموا بإطلاق الأعيرة النارية تجاه قوات الشرطة فبادلتهم مما أسفر عن مصرعهم وحدوث تلفيات بسيارات الشرطة من جراء إطلاق الأعيرة النارية))
السؤال بقى: عصابة مين الفاجرة دي اللي عملت جريمة هزت العالم وعارفة ان الكل بيدور ع القتلة وشغالة كده ما همدتش!!

٦- شوف الأكشن ده بقى : حيث تبين أن السيارة الميكروباص مزوده بستائر لحجب الرؤية وعُثر بداخلها على ( جثة أحد الأشخاص مجهول الهوية فى العقد الثالث من العمر بها طلق نارى "جارى تحديد شخصيتة" عصابة ماشية بجثث كده عادي !! طب دي عصابة بتحب المتعلقات والحاجات اللي مكتوب عليها LOVE راحت فين متعلقات الجثة اللي معاهم!!

٧- شوف بقى سبحان الله الـ ٩ جرائم اللي الداخلية شيلتهم للعصابة حصلوا في قسم شرطة أول مدينة نصر وأول القاهرة الجديدة.. ريجيني اتخطف في الدقي واترمى في أكتوبر.. وانتم سيد العارفين مفيش حرامي بيدخل منطقة حرامي تاني.. كل واحد ومنطقته.. اشمعنى ريجيني !!

٨- ندخل بقى ع المضبوطات اللي لقوها في شقة أخت زعيم العصابة.. عصابة أيه الخايبة دي اللي سايبة معاها دليل اعدامها وقال أيه نشاطها شغال حلاوة.. طب كانت حطت الشنطة في الفرن ولا رمتها في النيل!

٩- طالما لقيتوا المضبوطات في الشنطة الـ NIKE اللي عليها علم إيطاليا.. أيه لازمته غطا الغسالة اللي نشرتوا عليها الباسبور!! ليييييه!!!

١٠- طيب دول حرامية.. يعني عايزين الشنطة والفلووووس بس.. ريجيني اتعذب لييييه بقى؟؟ وعصابة ايه دي اللي تسرق وتاخد الزبون وتعذبه وتخلي معاها متعلقاته ذكرى؟؟ إذا كانوا رموا الجثة نفسها يا موحدين بالله!

١١- بيان الداخلية بيشكر الجانب الايطالي على تعاونه في التحريات!! يا راجل قول وغير.. عييييب

١٢- ارحموا عقلية اللي جابونا.. اقنعوا الناس بحاجة منطقية.. مش من موضة الماس الكهربائي والمختل عقليا إلى عصابة اتصفت ماشية بقتيل في ميكروباص وبتحتفظ بالمتعلقات.. دا اللي بيسرق محفظة بيرمي اللي فيها بعد عشرة متر ويضرب الفلوس في جيبه

١٣- اعترفوا بفشلكم أو أعلنوا أسماء القتلة الحقيقيين.. كفاية كده بقينا مسخرة في العالم كله.. غطا غسالة؟؟ هي دي آخرتها ؟؟

١٤- هي أخبار الأخ شاهد الزُّور أيه؟؟ ولا اخبار اخر مكالمة جت من اخوانجي؟؟ السلام أمانة يا داخلية عبيطة.

الخلاصة: سيناريو هابط.. مخرج فاشل.. أفلام السبكي أحسن منه

جدير بالذكر أن وزارة الداخلية نشرت بيان على صفحتها الرسمية بموقع التواصل الاجتماعي "فيس بوك"، أعلنت فيه عثورها على متعلقات وأوراق الباحث الإيطالي بحوزة التشكيل العصابي التي قامت بتصفيته أمس، فيما قوبل بيان الداخلية بعاصفة من السخرية من الرواية التي سردتها الداخلية واعتبروها بمثابة "فيلم" هابط.
سياسة | المصدر: محمد الجارحي | تاريخ النشر : الجمعة 25 مارس 2016
أحدث الأخبار (سياسة)
يمكنكم متابعة احدث اخبارنا عن طريق شبكات التواصل الاجتماعى المختلفة
facebooktwitterRss
2021®أخبار الصباح AkhbarAlsabah.com