مرور الإسكندرية يهدد السائقين بالسلاح

تشهد شوارع الإسكندرية، في الأيام الأخيرة، تواجدًا شرَطيًا مكثفًا، متمثلًا في أكمنة مرورية مسلحة، ومدعومة بأفراد من الأمن المركزي، الأمر الذي أدى لحدوث حالات زحام مروري خانقة.

بالإضافة لذلك، جاءت شكاوى سائقي سيارات الأجرة، من سوء معاملة أفراد الشرطة لهم، والمتعدي أحيانًا إلى الإهانة أو التهديد، كما أخبرنا سامح السيد (سائق تاكسي)، بقوله: "الحكومة بتهددنا بالأسلحة اللي معاها، علشان تاخد الرخصة وتقايضني عليها بعد كده".

وأكّد على سوء معاملة شرطة المرور، حسن كريم، سائق تاكسي، والذي قال: "الشرطة مبتعملش حاجة، غير إنها بتبلطج علينا وخلاص"، مضيفًا: "كل الأكمنة فيها أمن مركزي بالسلاح عشان لو السواق اعترض يتسحب هو وعربيته".

هشام السيد (سائق ميكروباص) وصف معاملة الشرطة بـ"قمة البلطجة"، موضحًا أنه "لما ينزل ضابط مرور السلاح في جيبه، ومعاه 3 عساكر أمن مركزي؛ كل ده ليه؟".

أما سالم محمد (مواطن)، فتساءل مستنكرًا: "هو فين تنظيم المرور؟ الشوارع كلها زحمة وكل واحد بيعمل اللي هو عايزه"، موضحًا: "الناس بتكسر الإشارة، واللي يمشي مخالف، والشرطة مبتنظمش حاجة".