أهالي بني سويف: احنا لاقيين ناكل عشان ندفع كهرباء

لم يشهد رمضان زيادة متلاحقة في كل الأسعار فحسب، وإنما شملت هذه الأعباء فواتير الكهرباء أيضًا في بني سويف.

يقول إسلام طه: "مش بنقعد في بيتنا أساسًا كتير، طول اليوم بنبقى قاعدين في المزرعة بتاعتنا، ولو قعدنا في البيت مش بنكمل ساعتين في اليوم كله، وبنقعد مثلا في أوضة واحدة كلنا، كان بيجيلنا أقصى مبلغ كان 35 جنيه الشهر ده جايلنا 140 جنيه، رحت شكيت في المحطة يراجعوا العداد ومحدش سأل فيا وياإما الدفع ياإما قطع الكهرباء".

وأضاف سيد ممدوح، "يعني الكهرباء تبدأ تقطع بالساعات، وساعات تقطع 5 ساعات متواصلة، وأنا في بندر بني سويف يعني المفروض متقطعش خالص، وكمان تيجي فاتورة الكهرباء 120 جنيه، وأنا أساسًا شقة أوضة وصالة، هكون بستهلك منين المبلغ ده؟".

وقال حسن خليل، صاحب محل: "كنت بدفع فاتورة الكهرباء في شهر 600 جنيه، الشهر ده جاييلى 1300 جنيه كهرباء بس، طيب اجيب منين لكل ده؟".

وتابع طه سيد: "الفاتورة الشهر ده جايلي 90 جنيه مع إني مش عندي مراوح ولا كمبيوتر ولا أي حاجة بتستهلك، حتى جايب لمبات موفرة للكهرباء، وبيتنا كله أوضتين، كان أكبر مبلغ كان بيجيلي 15 جنيه، الشهر ده وصل مرة واحدة 90 جنيه ازاي مش عارف؟".

وختمت أم علي حسن: "هي الناس لاقية تاكل عشان تدفع فلوس كهرباء، مش عارفة هندفع كهرباء ولا مياه ولا إيجار للشقة، ولا دروس لأولادي ولا أكل ولا شرب ولا ملابس، بقت حياتنا جحيم مش عارفين نجيب منين، حرام الأسعار بقت نار".