إنزل وشارك لآن الجسمي حيغني ويرقصلك المدام

كتب المستشار وليد شرابي تدوينة على صفحته الشخصية على الفيس بوك، بمناسبة الانتخابات الرئاسية قال فيها: “إنزل وشارك فى الإنتخابات .. مش حقولك إن ذنب الشهداء حيكون فى رقبتك ، ولا حقولك دعاء المصابين والمعتقلين لك نصيب فيه ، ولا حقولك إنك حتشارك فى إستمرار تشريد ألاف المطاردين والمقهورين … لا لا لا كل ده بين الناس وبين ربهم … أنا حقولك إنزل و شارك لأنك لما شاركت فى 30 / 6 ضحكوا عليك وقالولك الكهرباء بتقطع ساعه كل يوم فى الصيف وإن المشكله حتتحل على إيديهم .. إنزل و شارك وإذا كنت زعلان من الكهرباء اللى بتقطع كل شوية انزل و شارك لأن أثيوبيا كمان شوية حتقطع الميه من البيت والغيط .. إنزل و شارك وساهم فى رفع الدعم عن كل شئ مدعوم .. إنزل و شارك لأن التطبيع الزراعى مع إسرائيل رجع تانى بسرطاناته وفشله الكلوى وإلتهابه اكبدى .. إنزل و شارك لأن أمن دولة مبارك رجعت تانى وإنت وعيالك والمدام محدش منكم ينفع يهرش فى البلد إلا بموافقته .. إنزل و شارك علشان جيشك قادته بتأجره وبتسمسر من وراه وحولته لجيش مرتزقه فى ليبيا وجنوب السودان ولسه اللى جاى أحلا .. إنزل و شارك لأن الأزهر و الكنيسه دخلوا الدين فى السياسة .. إنزل شارك لأن الكنيسة قالت لك إن نعم بتجيب النعم والحمد لله كله واضح .. إنزل و شارك لأن عندك واحد كومبارس بيمثل عليك إنه مرشح ومفهمك إن فى إنتخابات .. إنزل شارك وإنت عارف مين اللى هيكسب بس إضحك على نفسك .. على فكرة اللى حيكسب ده بيقولك أجيب لكم منين ما فيش ما فيش”.

واضاف شرابي في تدوينته: “إنزل وشارك لأن إقرار الذمة المالية لمرشح الجيش فيه 30 مليون جنيه بس !!! وهو كان محوشهم من مرتبه بعد ما كان هو وأبوه مأجرين شقه فى حاره فى الظاهر .. إنزل و شارك لأن اللى بيقول ما فيش ما فيش صرف لخالد يوسف 30 مليون جنيه فى خمس ثوانى .. إنزل وشارك لأن اللى صرف ال 30 مليون جنيه ده لسه مبقاش رئيس لكن إعمل نفسك ميت .. إنزل و شارك لأن اللى بيقولك ما فيش ما فيش كل شهرين بيزود مرتبات الجيش والشرطة والقضاء .. إنزل و شارك لأن بلدك بتخسر كل جيرانها ما عدا إسرائيل .. إنزل و شارك لأن مرشح الجيش الصهاينه بيدعوله إنه ينجح .. إنزل و شارك وإسمع كلام إيهود باراك وإنتخب السيسى .. إنزل وشارك لأن عساكر الجيش بتوزع زيت وسكر علشان مرشح الجيش .. إنزل و شارك لأن القوات السودانية فى حلايب لكن لسه ما خدتش شلاتين .. إنزل وشارك لأن سيناء بتقصف كل يوم بالطائرات المصرية !!! .. إنزل و شارك لأن وزير الصناعة قالك مش حنضحك على بعض مصر خلاص أفلست .. إنزل وشارك لأن من 30 / 6 / 2013 لغاية أخر مايو 2014 الجنيه خسر جنيه أمام الدولار .. إنزل و شارك لأن عمرك اللى ضاع فى دولة مبارك وجمال إبنه اللى نهبوا البلد إبنك كمان حيضيع عمره فى دولة السيسى ومصطفى إبنه .. إنزل وشارك لأن مرشح الجيش مش بيحب الواسطة لكن ولاده فى المخابرات والرقابة الإدارية .. إنزل وشارك لأن مرشح الجيش ملتحم بالجماهير (عبر سكايب ) .. إنزل و شارك لأن الستات حترقص قدام اللجنة ودى بشرة خير .. إنزل شارك لأن وزير الزراعة تعهد إن مافيش ديون حتترفع من على الفلاح .. إنزل وشارك وإسمع كلام الإعلام اللى بيحب البلد وخايف عليها ( عمرو ولميس والإبراشى ومصطفى بكرى ….. ) .. إنزل وشارك لأن القضاء مافيش منظمة فى العالم إلا وبتدينه .. إنزل وشارك لآن الجسمى حيغنى ويرقصلك المدام .. إنزل وشارك إستمراراً لحكم العسكر من ستين سنه لغاية لما بقت مصر زى ما إنت شايف .. إنزل وشارك وإعمل عبيط”.