اخبار مصر
Akhbar Alsabah اخبار الصباح
فيديوهات مصرية
حوار طريف في الميكروباص بين مؤيد و معارض
الميكروباص ركبت ميكروباص خط ( الجيزة - حلوان ) المسافه طبعًا طويله وتسمح بإدارة حوار
أعتمدت هذه المره على خُدعة وهى إظهار الإنتماء لما أسميته سيادة المشير عبد الفتاح السيسي
لا أخفيكم سرًا كنتُ شغوفًا بمعرفة أسباب تأييد الناس لهذا الشخص من ألسنتهم
بدأ الحوار من السائق الذى كنت أجلس بجانبه لما سألنى : هتنتخب مين يا شيخ ؟
هنا بدأ الحوار وبدأت الفرصة
إستدرت للخلف ورفعتُ صوتى : هو فى حد يا اسطى فى البلد دى مش هيدى صوته لسيادة المشير عبد الفتاح السيسي ؟؟ لكن أنا مهتم بقى يا اسطى إنى اسأل الناس اللى راكبه معانا فى الميكروباص
هتنتخبوا السيسي ليه ، وعايز اسمع ردود من الناس ، عايز اسمع ردود نعرف نخاطب بيها الجهله اللى مش عايزين ينتخبوا سيادة المشير
يا جماعه مين هينتخب سيادة المشير عبد الفتاح السيسي ؟
عايز سبب واحد بس من كل واحد هينتخبه
وطبعًا لو قولت لكم إنى فى الحملة الإنتخابيه بتاعته يبقى أكيد هتسمحولى بإنى أناقشكم وأعرفكم إزاى تعرفوا الناس على سيادة المشير
هنا بدأت المسرحية وتوالت المفاجآت
من آخر كنبه فى الميكروباص يأتى ذلك الصوت الأجش من صاحب التجاعيد التى تظهر أنه فارق الستين أو ربما فارق السبعين وهو فى انتظار أن تُقبض روحه ، قال : هننتخب السيسي عشان دكر
قلت : لا يا حاج بالله عليك عايزين نكلم الناس كلام مفهوم ، ما اهو انت دكر وأنا دكر ومرسي كان دكر لما فتح صدره فى ميدان التحرير فى وسط الجمهور رغم إنه معروف إن له أعداء
عايزين نكلم الناس كلام منطقي ، مينفعش حوار دكر دى يا حاج وبالله عليك متخليش الحاجه مرات حضرتك تقولها علشان بيبقى شكلنا وحش أوى والإخوان بيقعدوا يعيبوا علينا ( كم أنا خبيث )
طبعًا الراجل سكت مُفسحًا لغيره أن يتكلم
يأتى الصوت من الكنبه الأولى من شاب عشرينى : علشان هو شال الإخوان
قلت : لا يا حبيبى يعنى إنت عايز تنتخب واحد علشان شالك واحد تانى ، طيب الإخوان بيقولوا عليه فاسد وحرامى وبيقولوا إنه شال مرسي علشان مرسي كان نظيف وبيقولوا على مؤسسة القوات المسلحه الباسله إنها حراميه وبتسرق فى البلد بقالها ستين سنه وبيقولوا فى جيش يعمل مصانع مكرونه ؟؟ ، مينفعش انت بقى مع كل ده تيجى تقولى هانتخب السيسي علشان شال الإخوان ، لازم يبقى عندنا عقل شويه علشان نعرف نخرس الإخوان واحنا بنتكلم معاهم
يا شباب عايز اسمع إجابه قويه ؟؟
مش معقوله يبقى مؤيدين سيادة المشير ومش عارفين إحنا مؤيدينه ليه هنضحك الناس علينا
رد رجلٌ يدعي الوقار : بص يا شيخ طبعًا البرنامج الإنتخابى بتاع سيادة المشير عبد الفتاح السيسي مُقنع جدا
والراجل معاه الجيش وأكيد هيقدر ينفذ البرنامج ده
قلت : لا يا استاذ الكلام اللى حضرتك بتقوله ده سامحنى يعنى مع احترامى لحضرتك من أسوء ما يكون
أقولك ليه
أولًا . سيادة المشير عبد الفتاح السيسي معملش برنامج إنتخابى أصلا يا ناس لازم تفهموا إن الراجل ده أكبر من إن هو يعمل برنامج إنتخابى لشوية بهايم كل همها فى الانتخابات إنها تسأل ورينا برنامجك الانتخابى
سيادة المشير مش محتاج برنامج
وعلى فكره حضرتك لو قلت للإخوانجى سيادة المشير هيعرف يحقق برنامجه الإنتخابى علشان الجيش معاه يبقى انت بتؤكد فكرة الإنقلاب العسكرى اللى هما فاقعين مرارتنا بيه
يبقى انت بتؤكد إن اللى معاه السلاح هو اللى هيعرف يقود البلد وبس
وإن مينفعش حد يكون عايز يصلح زى ما هم بيقولوا على مرسى لو مش معاه الجيش يبقى يسقط
يبقى انت كده بتؤكد نظرية الإنقلاب العسكرى
ثم نظرت لكل من فى الميكروباص موجهًا كلامى لهم
مش ممكن يكون الميكروباص كله يا جدعان مفيهوش فكره واضحه مقنعه لتأييد سيادة المشير
عايزين أفكار نفشـ. بيها دماغ الإخوان لأنهم قاعدين ليل نهار على قناة الجزيره بيلعبوا فى دماغ الناس علشان بيعرفوا يتكلموا بالمنطق
واحنا مش عارفين نتكلم بالمنطق
رد واحد من الكنبه قبل الأخيره : بص يا شيخ سيبك من الإخوان البلد دى مينفعش يمسكها غير حد قوي حد بيخوف
حد محدش يعرف يقف قدامه
قلت : لا يا سيادة المحترم ، أولا مينفعش تقولى سيبك من الإخوان لانى زى ما قلت دلوقتى قاعدين ليل نهار على قناتهم بيلعبوا فى دماغ البسطاء من شعبنا ( واخدلى بالك من حتة شعبنا دى ) ( حطيت عليهم وهما مش واخدين بالهم )
بص يا استاذ الكلام اللى انت بتقوله ده مينطبقش على الواقع أبدا
القوة عمرها ما قومت بلد
هما كمان كانوا شايفين إن حازم ابو اسماعيل رجل قوى ومحدش بيعرف يناقشه ولا يغلبه
ومعنى كلامك ده إن إنت كده عايز تقولى إن أى حد هيعترض على أى حاجه على سيادة المشير .. سيادة المشير هيقمعه
أمال إحنا نزلنا ثورة يناير نهبب إيه
ما هو علشان الناس تعرف تقول كلمتها ورأيها من غير قمع
مينفعش تخاطب شعب خارج من ثورة يناير ووراها ثورة تلاتين سونيا زى ما الاخوان بيقولوا عليها
مينفعش تحاطب الشعب ده تقوله أنا هانتخب السيسي علشان هيقمعك لو اعترضت عليه
وهنا جاء الختام عاااااا
الحاج اللى ورا فى الكنبه الأخيريه قال : طب ما توعينا انت يا شيخ عشان انت وغوشتنا
أخذت نفسًا عميقًا واستعنت بالله وقلت : شوف يا حاج كل الكلام اللى انتو قلتوه مينفعش يتقال كسبب لترشيح السيسي
أنا عايزك تقول بصراحه وبعلو صوتك
عايزك تقول أنا هانتخبه علشان يقمعنى لما اقف ضده
انا هانتخبه علشان قتل ناس فى المظاهرات
هانتخبه وهو معندوش برنامج
هانتخبه وعمره ما حضر مؤتمر شعبي
قول هانتخبه علشان دكر ؟؟؟ دكر إيه يا حاج ؟؟ فين الذكوره فى ان هو يستخبى وميعرفش يطلع يكلم الشعب
قول هانتخبه علشان معاه السلاح
قول هانتخبه علشان انا عبد
وهافضل عبد
وحابب العبوديه
قول هانتخبه علشان بحب الخنوع وبحب امشى زى الحمار بالعصايه
قول حاجه واحده مقنعه تخلينى أنتخب الكلب بتاعكم
ده كلب وهينقلب عليكم وهيسجنكم ومش هينموا بالبلد
للأسف إنتو بتحبوا اللى يديكوا بالجزمه
بتحبوا اللى يستعبدكوا
بتحبوا اللى يكذب عليكم
بتحبوا اللى يستعبطكوا
بتحبوا العسكر اللى بقاله ستين سنه بيسرقكم
بتحبوا الإعلام اللى بقاله ستين سنه بيكذب عليكم
والله إحنا شعب ميستاهلش النعمه
الرجاله لم تستفق من المفاجأه وكل فى ذهول إلا واحد عمال يقول : إيه ده ده طلع إخوان إيه ده ده طلع إخوان...
استوقفت السائق فى منتصف الطريق وتركتهم يتخبطون
شكرا حزب النور إنى عرفت البس عبايتكم الوسخه النهارده, مش عارف من غيركم كنت هاتكلم ازاى بدقنى دى.
سياسة | المصدر: مصطفى عبدالناصر | تاريخ النشر : الأحد 25 مايو 2014
أحدث الأخبار (سياسة)
تعليقات القراء
موقع أخبار الصباح على الفيسبوك
Akhbar Alsabah
أخبار الصباح على التويتر
خدمة أخر الأخبار
أضف بريدك الإليكتروني
للحصول على أخر أخبار مصر
الإشتراك سهل و مجاني
يمكنكم متابعة احدث اخبارنا عن طريق شبكات التواصل الاجتماعى المختلفة
facebooktwitterRss
2016®أخبار الصباح AkhbarAlsabah.com