Akhbar Alsabah اخبار الصباح

احنا رايحين فين؟

محمد محسوب عايز البلد تبقى حضارية وتتخلص من كل العشوائيات..والناس تعيش ف بيوت آدمية ويبقى عندنا شبكة مواصلات حديثة..مترو وترام واتوبيسات كافية ونظيفة ولها طرق ثابتة وتوصل بالثانية..وتحول شارع صلاح سالم لشانزلزيه الشرق.. وتبقى مراكزنا وقرانا تتنافس في التنظيم والجمال وتيسير معيشة الناس.. ويبقى في دولة فعلا تضمن للناس حياة كريمة وتوفر العمل لكل واحد؟!
لو عايزها كده.. هل فاكر إن اللي بيحصل ممكن يوصلنا لكده؟
تبقى مش فاهم لإن اللي بيحصل تكرار للي بدأ من ستين سنة.. رفعوا شعارات كتيرة.. اولها تكريس حياة ديموقراطية سليمة فتكرست الدكتاتورية.. وتانيها عدالة اجتماعية فحلت الطبقية وبقت مصر ثروتها بإيد أقل من 5% من سكانها..
لو عايز فعلا تحقق حلم بلد عصري يكون لكل ابناء شعبه يبقى لازم تعمل حاجة جديدة..
لازم تستعيد الديموقراطية اللي فقدتها بالانقلاب..
هم خوفوك غن فيه حزب حكم..وجماعة بتستأثر..
طب اسأل نفسك.. هي الديموقراطية إيه؟..
الشعب يختار مجموعة يحكموه.. لو نجحوا يختارهم تاني..لو فشلوا يغيرهم في نفس الموعد بنفس الطريقة.. لإنه لو سمع كلام اللي بيقولوا: لا لا.. لو مش عجبك بعد شهر اخلعه بالمظاهرات..يبقى مش ها يعيش للشعب حاكم يختاره.. وها يعيش بس الحاكم اللي بيفرض نفسه بقوة السلاح.. ودا اللي حصل..
بلاش تقولي دا اللي اخترناه أخطأ وأخطا.. لإن الديموقراطية ما بتجبش معصومين ولا أفضل الخلق.. لكنها بتضمن ليك إنك تشارك وتنتقد وتسقط اللي مش عجبك..
كمان الديموقراطية مش علشان دا يحكم ولا دا ما يحكمش.. دي علشان الشعب يختار مش ينفرض عليه..
والأهم من ده إن أهل الحكم يتبعوا شعبهم ويخدموه.. مش يستعملوه ويستغلوه ويحتقروه.. وبعدين ف السجن يرموه..
وعلشان تبقى موازنة الدولة بكل قرش فيها.. بما فيها فلوس القضا والجيش.. تحت نظر الناس وبتتناقش علني.. متقولش اموال الجيش سر حربي.. لإن أكبر جيش في العالم بينقشوا ميزانيته علنيا..
وعلشان ما تجيش سلطة تحاول تقسم الشعب لشعبين.. شعب معاها وشعب يستحق الموت..
وعلشان..وعلشان..
منقولش.. آه مرسي حكم سنة..ولا شفنا المواصلات ولا الحضارة ولا الشانزليزيه..
لا يا عمنا.. البلاد بتطور بالتراكم..علشان كده عملوا مده للحاكم وللحكومة علشان ياخد فرصته ويبين كرماته..
ودلوقتي.. عايز تعطي للانقلاب فرصة؟!
طب ليه لم تعط للديموقراطية فرصة؟!
الانقلاب ها ياخد الفرصة علشان يرسخ قيمه..القمع للمخالف..وتكوين شبكة الفساد اللي بيعتمد عليها واللي انت خبرتها..وتعليم الشعب الخوف من الكلام او النقد..
بعد كده.. لا ها تقدر تقول دا حلوا ولا ده وحش.. ولا ها تقدر تقول صرفتوا كام ولا فلوسنا فين.. من النهاردة ماقدرش..وإلا وريني شجعتك كده!!
لسة الفرصة قدامك.. الانقلاب هش.. لساه انقلاب ولسة إيده ملونة بلون الدم..
قبل ما يغسل إيده ويخلع بدلته ممكن تفكر تاني.. إحنا رايحين فين؟
سياسة | المصدر: د. محمد محسوب | تاريخ النشر : الثلاثاء 04 فبراير 2014
أحدث الأخبار (سياسة)
يمكنكم متابعة احدث اخبارنا عن طريق شبكات التواصل الاجتماعى المختلفة
facebooktwitterRss
®أخبار الصباح AkhbarAlsabah.com