ملاحظات على نتيجة المرحلة الأولى من الإستفتاء

أحمد الله على ما آتانا من فضله ووفقنا إليه من نعم , دي شوية ملاحظات على نتيجة المرحلة الأولى من الإستفتاء :

1- زي ما قلت في بوست سابق الإستفتاء ده مش على الدستور بس وإنما كمان على خارطة طريق الإسلاميين ومستوى الثقة في الدكتور مرسي فنتيجة 57-43 % مش سيئة على الإطلاق .

2- حصلت نقلة نوعية في بعض المحافظات عن إنتخابات الرئاسة (الدقهلية-الغربية) وده مؤشر جيد للغاية لإن المحافظتين دول بالذ
ات من اللي تأثروا بدعاية وتخويف شفيق دون إنتصار أيدولوجي ليه فمعنى ذلك فيه أمل وأمل كبير.

3-إحنا كده خلصنا من محافظات الثقل المسيحي (القاهرة-الأسكندرية-أسيوط) وطبعا أي حد ملاحظ الحشد الضخم اللي إتعمل يكاد يكون مفيش مسيحي مرحش رفض الدستور .

4-مادة العزل السياسي لوحدها عامل كبير جدا في حشد الفلول بكل طاقتهم لإن دي معناها إنتحار سياسي ومصلحي ليهم لفترة طويلة والموضوع بالنسبة ليهم حياة أو موت.

5-الإغترار بالمحافظات المؤيدة للإسلاميين في المرحلة التانية ممكن يودينا في داهية, الشعب المصري بيحكم بشكل مستقل تماما والنتيجة بتاعة المرحلة الأولى تخليك تشتغل 10 أضعاف مش ترتاح وتتباهى بمحافظاتك القوية خاصة مع كمية التخاريف والتضليل الرهيب اللي سمعه الناس اللي وقفت في طوابير المرحلة الأولى.

6-ثبت بشكل قاطع إن المثقفين في مصر هم أجهل طبقة فيها ببساطة لإنهم بيسيبوا دماغهم للنخب وبيلغوا عقولهم تماما وبيمشوا مع القطيع في حين إن البسيط اللي مبيستوعبش الهرتلة اللي بتتقال في الفضائيات بيبقة حريص جدا يسأل ويفهم ويستشير قبل أي خطوة يعملها عشان كده معظم المناطق الراقية قالت لا ومعظم الصعيد والمناطق الشعبية قالت نعم.

7-النتيجة بشكلها الحالي هتعمل مشكلة كبيرة عند المعارضة وممولينهم لإنهم أمام إختيار صعب جدا : هل يستمروا ويحشدوا ويضللوا ويبقة عندهم أمل ولو بسيط يسقطوا الدستور في الصندوق ولا يروحوا لخيار الحرب الأهلية مباشرة ؟ أتوقع خناقات كبيرة جدا هتحصل بينهم لتقرير هما هيعملوا إيه(توقعي الخاص إنهم هيستمروا في المعركة الإنتخابية).