Akhbar Alsabah اخبار الصباح

أحمد السعدني: خايف اتسجن أو يطلعولي فضيحة!

أحمد السعدني نشر، الممثل أحمد السعدني تدوينة مطولة عبر صفحته الشخصية بموقع التواصل الاجتماعي "فيسبوك" فسر فيها تصريحاته التي قال فيها إنه يرفض حملة "عشان تبنيها" التي تهدف لانتخاب عبد الفتاح السيسي لفترة ثانية.

قال "السعدني" في تدوينته: "شاهد أحمد السعدني يهاجم السيسي .. عشرات التليفونات لمداخلات في برامج.. سبحان الله..... معلش حطول عليكم شوية .. بدأت كلامي اللي انتشر انتشار ڤيرس الإيدز أول ما ظهر بإني خايف... يا تري خايف من ايه؟.. خايف أولاً علي مشاعر زمايلي لإني أكيد بحبهم فخفت أضايقهم أو يزعلوا مني.. تاني حاجة خفت منها بصراحة إننا معندناش حرية رأي مع الاسف... بتنتقد تبقي عميل بتشيد تبقي مستفيد... مفيش حل وسط لازم يلونوك.. مينفعش تبقي واحد عادي السياسة آخر همه أساساً بس لما بيحس حاجة بيقولها عاجباه أو مش عاجباه عادي يعني.. فبما إن كلامي ده لا يرضي السادة المسئولين أكيد فخفت يحسبوني إخوان ولا قابض و ألاقي نفسي عاطل أو مسجون او مطلعنلي فضيحة (ما كلنا بنغلط) و هوب أبقي اتدمرت عشان قلت مش عاجبني".

وتابع بقوله: "معني اللي كتبته للي مفهموش ببساطة.. علي أساس يعني أن الشعب عمل ثوره 25 يناير لإحساسه بالقهر و الفقر و اليأس.. فقرر يثور عشان نبقي زي بقية خلق الله..... بما في ذلك انتخابات منصب الرئيس.. هما في أمريكا يعني قالوا لترامب والنبي تعالي ابنيها؟.. لا خالص... هو اللي طلع عينه عشان يقنع الناس تنتخبه .. رئيس الجمهورية موظف بيجتهد إنه يعمل مشروع لأربع سنين يقنع الناس بيه مش العكس.. المفروض إننا فهمنا خلاص إننا مش لازم خالص نغني للريس و لا نسقفله بعد كل كلمه بالعكس المفروض يكون في معارضة (محترمة) و أكتر من مرشح (محترم) لمنصب الرئيس.. ده لمصلحتنا كلنا و اللي عايز ينتخب أي حد ينتخبه بحرية".

اضاف: " كل اللي قلته للريس إن أكيد ده المفروض يكون واضح بالنسباله... وكمان إن زمان الناس البسيطة كانت بتتاثر بأغنية للعبقري عمار الشريعي اللي هو نفسه الله يرحمه تبرأ منها قبل ميموت.. فمش عشان شافوا كام ممثل و لعيب كورة بيمضوا حيعملوا زيهم يعني بالعكس ده ممكن يجيب نتيجة عكسية".. مضيفًا: "أنا طولت في الكلام بس أنا لا بطل و لا عميل أنا واحد عادي جداً قال كلمة حاسسها غلط صح هو كده و حقول اللي أنا عايزه... لأن ده الطبيعي وشكراً".
سياسة | المصدر: أحمد السعدني | تاريخ النشر : الخميس 19 اكتوبر 2017
أحدث الأخبار (سياسة)
يمكنكم متابعة احدث اخبارنا عن طريق شبكات التواصل الاجتماعى المختلفة
facebooktwitterRss
®أخبار الصباح AkhbarAlsabah.com